...:::حديث الأوراق النقدية:::...

من طرف **DARK ANGEL** 7/8/2009, 04:50

إجتمعت الأوراق النقدية وبدؤوا
يتناقشون على الوضعية، و كل يتكلم بهدوء و روية : فبدأ بالحديث حنبعل،
فقال بصوت خافت مذلّ: يا حسرة على زمان ، كان فيه صوتي رنان، و قدري مضمون
في كل مكان ، حطوتني على ورقة بوخمسلاف ، لا تشري لا قرط و لا أعلاف، و
توّة عوضوني ببياسة ، هذا حكم المحافظ و السّاسة .

...:::حديث الأوراق النقدية:::... 1248114693_tunisia86s1993oxx5

ردّت عليسة و قالت: أنا حطّوني في
ورقة مزيانة ، و بصورتي فرحانة، منظرها تشبّه للأورو، و الناس تدوّر بيها
الزيرو.لكن يا حسرة كيف كانت تجيب الخضرة و اللحم ، تشبّع العائلة و الجار
و ولد العمّ.

...:::حديث الأوراق النقدية:::... 1248114728_tunisianew1022005ori6

جاء دور خير الدين: أنا خير الدين
باشا ، ما يعرفونيش الناس العيّاشة، قليل باش يشوفوني ،ممكن يخافو مني و
إلا يكرهوني، أما الناس الغنيّة ، ما تستحفظش عليّ، في لحظة يصرفوني،
مزروبين باش يفارقوني و من باعد يقولو عليّ خايب و دوني.

...:::حديث الأوراق النقدية:::... 1248114750_tunisia88s1992ofg9

جاء دور سي بلقاسم : غريبة فيكم يا
أوخياني، تتشكّو و أنا من البطالة نعاني، كل من يشّدني ما ينصفني، بالرغم
من أشعاري في النشيد الرسمي،كأنو جاه البلاء ، يا ناس أنا أبو القاسم صاحب
أغاني الحياه، أنا إلي قلت من نام لم تنتظره الحياه ،أيّا فيق و أنشط و
قوم، توّه تلقاني في جيبك نعوم، تقضيلك قضية الدار و تعمل فطور قمقوم. أما
توّه جاني ضيف جديد ، رحّبو بيه من غير تمجيد.

...:::حديث الأوراق النقدية:::... 1248114774_tunisia89s1997orr5

الورقة الجديدة :
كان سكتو خير ، و يزّي من التنبير،
أنا يتمنى يشوفني الصغير قبل الكبير، مازلت مش معروفة ،و القيمة متاعي موش
مكشوفة، لكن هاو جاي رمضان و العيد و يشوفني الزوالي يولّى فرحان سعيد، أي
نعم أنا مفرّج الكروب، و نعبّي السيكان و الجيوب..
سمعت الحوار و أنا متخبّي، و بعدها
هبط عليّ الدّمار و الكبّي، زعمة الفلوس ما عادش فيها بركة ، و ما يعيش
كان إلى عندو ورث و تركة، و أنا خوكم زوالي شهّار، و الدنيا نار و مسمار،
أيّا روّحت للدّار، و قعدت نخمّم ليلة و نهار ، ربي يرحمنا و يبقي الستر
إنه هو الستّار...